1Cor 13 | YML | STEP | 'Ai'edi 'aku fata tomia fwayafwaya bonadi tulina tulina 'waidiega a da vonavona, 'alo anelose bonadiega, siwe kebu a da nuakalikaliga, yaku vonanidi 'adi nogaya nani-'avo'avovo 'wa da vo a da kwagekwage 'alo a da lu'e'e'ela.

1 Corinthians 13

Nuakalikali

1 'Ai'edi 'aku fata tomia fwayafwaya bonadi tulina tulina 'waidiega a da vonavona, 'alo anelose bonadiega, siwe kebu a da nuakalikaliga, yaku vonanidi 'adi nogaya nani-'avo'avovo 'wa da vo a da kwagekwage 'alo a da lu'e'e'ela. 2 'Ai'edi 'aku fata Yaubada yana Vona a da lulu'ivona, 'ai'edi Yaubada yana nuanua givagivadi a da 'asetadi, 'ai'edi nani matatabuna a da 'asetadi, wata 'ai'edi yaku vetumagana toketokeotogina bega 'aku fata a da vona 'oya 'waidie i da nagoi tulidie, siwe kebu a da nuakalikaliga, yau bani'odi nani-'avo'avovo. 3 Naninidi 'waikuye i 'eno'enoviga, 'ai'edi matatabuna a da 'anivelenedi, voke wata tomogoku a da tauyeni wafa 'waineye tomotoga faifaidi siwe kebu a da nuakalikaliga, ava'ai 'ana 'atumaina 'wainega a na veluagai?

4 Tonuakalikali kebu i da nuasako-matayo'o, i totokemaigamo wata ma yana nuakalikali i 'a'aivaita. Tonuakalikali kebu i da ve'unumagigi, kebu taunina i da awa'ai'aia wata kebu i da nunualaka. 5 Tonuakalikali i veve'ililibu, kebu taunina 'aisena faifaina i da nuanua, kebu i da logilogi, wata tomotoga yadi sakona 'waineye kebu i da nuanuanidi. 6 'Ai'edi tamu aitoi i na sakonaga, tonuakalikali kebu faifaina i na sosoana, we'e mogitana sauluva tonovidi faifaidi i sososoana. 7 'Ai'edi tamu tomogo i na vesauluva sakoina tonuakalikali 'waineye, i na tokemaigeni kebu i na veveifufu-vuvueni, tutuya matatabuna i na vetumagana tomogonina tomogo 'atumaina, i na nuani mogitana bega i na lulukamata yana sauluva i na veve'atumai, wata kebu tamu tutuya tomogonina i na baileni.

8 'Ada veuveuta tulina tulina 'Anu'anunu 'Atumaina yana 'anivelena, 'awaie i na 'a'ava, we'e nuakalikali kebu i na 'a'ava i na 'eno-vagata. Vetolu'ivona Yaubada yana Vona faifaina i na 'a'ava, 'Anu'anunu 'Atumaina yana 'alavelevelena bega tomotoga bonadi tulina 'waidiega i vonavona i na 'a'ava, wata 'aseta 'adi tokiavemageta yadi folova i na 'ailove. 9 'Ada veuveutanidi i na 'a'ava fai tutuya de'e Yaubada 'ana 'aseta 'waideye sai'afo, wata yada lu'ivona faifaina kebu ta da veveifufu-dewedi. 10 Siwe 'awaie Yaubada nani matatabuna i na sivemagese'a'avedi wata i na 'idewa'a'avadi nika bei naninidi sai'afo, i na savovola.

11 Side bani'odi. Basenadi siaikuye, yaku vona, 'aku vebae wata yaku nuanua yavayavava bani'odi. We'e tutuya de'e a taulaiga, yaku 'aseta i vebwaika wata sauluva yavayavava a bailedi. 12 Wata bani'odi tutuya de'e yada 'aseta Yaubada faifaina siaina, 'wa da vo ta da 'isa-ganuganuyeni, we'e 'awaie ta na vemaigi'isa'isa. Tutuya de'e yaku 'aseta Yaubada faifaina sai'afo, 'awaie a na 'asetaotogi yau tutuya de'e i 'asetakuga bani'odi.

13 Veuveutanidi 'Anu'anunu 'Atumaina yana 'anivelena 'awaie i na 'a'ava, we'e nani bwaikidi 'aitonu i na 'eno-vagata. Yada vetumagana Yaubada 'waineye, ta nuani mogitana bega ta lulukamata naninidi 'atumaidi i na 'i'idewadi faifaida, wata nuakalikali. Siwe 'aitonunidi 'waidiega nuakalikali nani bwaikaotogina.

S4 Lom 13:10S6 Lom 12:9S7 1 Fit 4:8S12 1 Ion 3:2